Stréito de Scîo

ZE	Quésta pàgina a l'é scrîta in léngoa zenéize A Grafîa adeuviâ a l'é quélla de l'Académia Ligùstica do Brénno

L'îzoa de Scîo vìsta da-o sciànco tùrco do stréito.

O Stréito de Scîo, conosciûo cómme Canâ de Scîo ascì (Δίαυλος Χίου in grêgo modèrno, trasliteròu in Díavlos Chíou, Sakız Boğazı in tùrco), o l'é 'n stréito do Mâ Egêo de levànte ch'o spartìsce l'îzoa grêga de Scîo, ch'a gh'à dæto o nómme, da-e còste da Turchîa, chi conpréize inta coscì dîta Región de l'Egêo.

Giögrafîa

Màppa nàotica do 1897 co-i ancoràggi into Stréito de Scîo

O stréito de Scîo o l'é làrgo ciù ò mêno træ mìggia marìnn-e e o sepâra l'îzoa de Scîo da dötréi ìstmi scitoæ in sciâ pónta de ponénte da Penîzoa de Karaburun, inta Turchîa. In sce st'estremitæ chi do teritöio tùrco gh'é diferénti pàixi e comùn, tùtti drénto a-a provìnsa de Smìrne. Tra sti chi, gh'é in particolâ a çitæ de Pasàrgo, ciamâ Çeşme in tùrco, ch'o l'é o comùn ciù a ponénte de tùtta a penîzoa e dónca o ciù vixìn a l'îzoa de Scîo. Pasàrgo a se trêuva inta pàrte ciù a nòrd da coscì dîta Rivêa tùrca, co-a porçión de còsta conpréiza into sò teritöio ch'a l'é squæxi do tùtto avansâ in sciô stréito de Scîo.

Spésse vòtte, cómme se peu védde da l'inmàgine in sciâ drîta, e montàgne de Scîo de la da-o stréito són vixìbili da-a Turchîa e vicevèrsa, scicómme da-a ciù pàrte da còsta de levànte de l'îzoa de Scîo, spécce da-e çitæ de Scîo e de Karfas, se peu védde quélla tùrca.

O clìmma e a tranquilitæ da pàrte de l'Egêo conpréiza into stréito de Scîo l'àn fæta vegnî 'na destinaçión turìstica e pe barchezâ bén bén conosciûa, ségge pi-â rîva grêga che pe quélla tùrca.